РЭНЦЭНГИЙН САНЖ
/1960-2020 он/

Цагдаагийн хурандаа Рэнцэнгийн Санж 2020 оны 03 дугаар сарын 17-ны өдөр зуурдаар таалал төгсөж, бидэнд нөхөж баршгүй гарз тохиолоо.

Рэнцэнгийн Санж нь 1960 онд Говь-Алтай аймгийн Дэлгэр сумын 4 дүгээр багийн малчин ард Рэнцэнгийн 7-р хүү болон төрж, 1968-1978 онд Дэлгэр сумын бага сургуулийг, Өвөрхангай аймаг, Улаанбаатар хотод дунд сургуулийг, 1980 онд Металистийн техник мэргэжлийн сургуулийг, 1989 онд НАХЯ-ны Цагдаагийн дээд сургуулийг, 2009 онд ТЕГ-ын дээд сургуулийг тус тус төгсөж, Улсын Цагдан Сэргийлэх Ерөнхий Газрын авто баазад 1981 онд орсноор цагдаагийн байгууллагад ажиллах ажлын гараагаа эхэлжээ.

Тэрбээр цагдаагийн байгууллагад тасралтгүй 34 жил ажиллахдаа 1989-1996 онд Төмөр зам дахь цагдаагийн хэлтэст төлөөлөгч, өмчийн төлөөлөгч, эрүүгийн ахлах төлөөлөгч, 1997-1999 онд Цагдаагийн ерөнхий газрын Зохион байгуулалттай гэмт хэрэгтэй тэмцэх хэлтэст чиглэл хариуцсан ахлах төлөөлөгч, 1999-2000 онд Налайх дүүрэг дэх цагдаагийн хэлтэст дэд дарга, 2000-2001 онд Эрүүгийн цагдаагийн газрын 4 дүгээр хэлтэст эрүүгийн ахлах төлөөлөгч, 2001-2010 онд Төмөр зам дахь цагдаагийн хэлтэст эрүүгийн ахлах төлөөлөгч, эрүүгийн асуудал эрхэлсэн дэд дарга, цагдаагийн хэлтсийн дарга, 2010-2012 онд Нийтийн хэв журам хамгаалах газрын Дипломат байгууллага, банкны хамгаалалтын хэлтсийн дарга, 2012-2014 онд Эрүүгийн цагдаагийн газрын Захиргааны удирдлагын хэлтсийн дарга, 2014-2015 онд Зохион байгуулалттай гэмт хэрэгтэй тэмцэх газрын Хяналт, шинжилгээ үнэлгээний хэлтсийн даргаар үр бүтээлтэй ажиллаж байсан.

Түүний гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах ажилд оруулсан хувь нэмэр, хөдөлмөр зүтгэлийг төр засгаас өндрөөр үнэлж, Хөдөлмөрийн гавьяаны улаан тугийн одон, Цэргийн гавьяаны одон, Хууль Зүй, Дотоод хэргийн яамны “Цагдаагийн алдар” тэмдэг, Цагдаагийн ерөнхий газрын “Цагдаагийн гавьяа” тэмдэг, “Хүндэт жуух”, Тагнуулын ерөнхий газрын “Тагнуулын алдар” тэмдэг, Төмөр замын удирдах газрын “Хүндэт төмөр замчин” тэмдэг, “Онц тээвэрчин” тэмдэг, Цагдаагийн ерөнхий газрын “Баярын бичиг” болон бусад шагналуудаар шагнажээ.

Цагдаагийн хурандаа Р.Санж нь төр, ард түмнийхээ өмнө өргөсөн тангарагтаа үнэнч байж, цагдаагийн байгууллагын хөгжлийн түүх, эрүүгийн албанд өөрийн мэдлэг, чадвар, оюун ухаанаа зориулсан, бидний бахархал болсон туршлагатай удирдах ажилтан байлаа.

Талийгаачийн шударга, зарчимч, хүнлэг энэрэнгүй, шаргуу хөдөлмөрч, хичээнгүй зан чанар, мэргэжлийн арвин их туршлага, нөхөрсөг даруухан дүр нь цагдаа, дотоодын цэргийн байгууллагын алба хаагчдын сэтгэл зүрхэнд үеийн үед мөнхрөн үлдэх болно.

Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.

ЭРҮҮГИЙН ЦАГДААГИЙН АЛБА