Яг одоо таны хүүхэд юу хийж байна?
“Яг одоо таны хүүхэд юу хийж байна? Хаагуур хэнтэй нөхөрлөж байна? Гэртээ байна уу, аль эсвэл найз нөхөдтэйгөө зуны сургалтад хамрагдсан уу? Харин цоожлогдсон уу?”
Та энэ асуултыг өдөр бүр өөртөө тавьж үр хүүхдээ аюул эрсдэлээс хамгаалахгүй бол өнгөрсөн хойно гэмшээд барахгүй аюул нүүрлэж болзошгүйг цагдаагийн байгууллагаас анхааруулж байна.
2018 оны 08 дугаар сарын 19-ний өдөр 16 цагийн орчим 5 настай, эмэгтэй Э нь Дархан-Уул аймаг Дархан сумын 3 дугаар баг Хараагийн 2-р байр гэрийнхээ гадаа тоглож байгаад сураггүй алга болсон дуудлага мэдээллийг тухай өдрийн 20 цаг 30 минутад Дархан-Уул аймгийн Цагдаагийн газарт ирүүлсэн.
Дуудлага мэдээллийн дагуу Дархан-уул аймгийн Цагдаагийн газрын дэд бөгөөд Эрүүгийн тасгийн даргаар ахлуулсан 80 албан хаагч, аймгийн онцгой байдлын хэлтсийн 6 алба хаагчийн хамтаар Дархан сумын 1,2,3 дугаар баг, Хараа гол орчим эрлийн ажлыг зохион байгуулсан.
Шалгалтын явцад иргэдээс 45-47 орчим насны хар царайтай, мөрөө шүргэсэн урт хар үстэй, үсээ задгай тавьсан, бараан өнгийн хувцастай хар өнгийн үүргэвч үүрсэн эмэгтэй хүн 4-5 настай эмэгтэй хүүхдийг хөтлөөд явж байсан нөхцөл байдал тогтоогдож.
Эрүүгийн цагдаагийн алба, Дархан-Уул аймгийн цагдаагийн газар, Хан-Уул дүүргийн цагдаагийн хэлтсүүд эрэн сурвалжлах ажлыг хамтран шуурхай зохион байгуулж ажилласны үр дүнд “Б” нь сураггүй алга болсон “Э”-г Баянзүрх дүүрэг авто вокзалын орчим авч явж байхад нь цагдаагийн байгууллагын алба хаагч нар дайчлан баривчилсан.
Хохирогч “Э”-г Эх нялхсын эрүүл мэндийн төвд нарийн мэргэжлийн эмч нараар үзлэг хийлгэсэн ба урьдчилсан байдлаар биед учирсан гэмтэл шарх сорвигүй, биеийн байдал хэвийн байсан ба түүний эцэгт хүлээлгэн өгсөн.
Уг хэрэгт Эрүүгийн хуулийн тусгай ангийн 13.2 дугаар зүйлийн 2.1 дэх хэсэгт зааснаар хэрэг бүртгэлтийн хэрэг нээн шалгаж шалгалтын ажиллагааг зохион байгуулан ажиллаж байна.
Эцэг эхчүүд хараа хяналтаа сайжруулж бага насны хүүхдийг асран хамгаалагчгүй ганцаар нь орхихгүй байхыг цагдаагийн байгууллагаас анхааруулж байна.
